睇開本欄的戰友，都知道魏力今年的精選之一就是金山軟件（3888），4月份於7蚊首次推介，至今升幅135%，10蚊、13蚊及16蚊三個目標價逐一擊破，半年業績後，魏力再計多次數，新目標價（最保守）係20蚊！
刨完業績以及大行報告之後，魏力對金山的感覺是：佢越來越似一間小型騰訊（700）：用戶高增長、業務多元化，並以手機平台貫穿四大業務，未來兩、三年的盈利藍圖呼之欲出。金山業務包括：遊戲（電腦＋手機）、防毒軟件＋瀏覽器、辦公室應用軟件，以及雲端服務。
目前金山主要靠遊戲食糊，佔總收入54%，《劍網3》上季收入1.06億人仔，按年增長71%；今年推出的月費計劃，刺激付費用戶急升42%至180萬。而6月份推出的《安史之亂》，獲新浪網列為新遊戲第一名，足證金山已找到遊戲的成功方程式。未來一年公司將再推出3至5個新網遊，盈利高增長可期。
中央全力打擊老翻，政府及企業一律要轉用正版軟件，為金山旗下防毒及辦公室軟件帶來龐大商機。未來一年將是軟件更換的高𥧌期，勢成盈利「明日之星」。
再者，旗下「獵豹搜尋器」及各類軟件均可藉Android下載至手機，並預裝於小米各款手機，有助培養客戶忠誠度及提升用戶體驗。至於雲端業務仍處於投資期，可望成為兩年後的新增長引擎。
魏力
http://www.facebook.com/2012jason
肥佬黎有今日，全賴阿媽細個同佢講過乜？即睇最新一集《亂噏24》，話唔定幫到你！
http://bit.ly/appletalk24