西班牙球手拿度越戰越勇，上周六美網男單第3圈以盤數3:0，輕取克羅地亞嘅杜迪，殺入16強之餘，今夏硬地賽連勝紀錄仲延續到18場，認真威！女單方面就爆冷連連，捷克嘅姬維杜娃同丹麥球手禾絲妮雅琪，雙雙爆冷輸波出局。（now676台今日11:45pm起直播）
2號種籽嘅拿度，只係用咗兩個鐘頭，就以6:4、6:3、6:3擊敗杜迪，氣勢依然勁爆；佢賽後都話自己狀態冇得頂：「我贏波係因為自己喺底線打得好，而且喺正確嘅時機，做出正確嘅決定。」
禾琪大賽又冇料到
雖然杜迪兩年前喺羅渣士盃贏過拿度，但係後者狀態咁好，想重演爆冷美夢真係冇乜可能。不過，拿度冇因為咁而自滿：「重要時刻都可以發到好球，但係整體嚟講自己發球只係OK。」拿度下一場對手係，德國22號種籽高舒萊巴，睇吓佢可唔可以繼續大勇啦。
男單賽果正路，女單就完全唔係嗰回事。7號種籽姬維杜娃竟然以盤數0:2，不敵美國非種籽球手莉絲克出局；前「1姐」禾琪唔好得幾多，盤數1:2輸畀意大利嘅姬奧芝，繼續喺大賽冇料到。
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange