香港呢排好「正氣」，市民一講粗口，特首即時要局長交報告，警方重案組要調查，呢股正氣噚日吹到去維園《城市論壇》。
因為論壇講政改，正當民主黨林卓廷發言批評梁振英謊言治港時，突然有位維園阿伯高喊「調理農務」。之後主持人謝志峰就火都嚟，裁定呢句係粗口，阿伯再講要被out。咁勞福局局長、安老事務委員會主席快啲提交報告啦，警方快啲立案調查啦，阿伯喺維園講粗口，係好大件事㗎，教壞細路呀！
噚日係城壇放完暑假後回歸，論壇未開波，就先討論紅白二事。因為維園阿伯許金池早前仙遊，佢老友維園阿伯文先生為佢主持簡單嘅「哀悼會」，仲請大家為許伯伯默哀一分鐘，但合上眼未夠20秒，文先生就話「因為時間關係」默哀完畢。
謝志峰之後同嘉賓提起，公民黨主席余若薇上周六嫁女，言談間有人透露《城市論壇》常客、禮義廉周浩鼎下年都小登科。此外，狼英「死敵」自由黨田北俊噚日喺論壇上，俾維園阿伯當泛民係咁鬧，見慣風浪嘅田少一於少理，繼續淡定鬧狼英。
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange