全球最吸金女模，據《福布斯》公佈屬80後天下，佔八席位，最老是快40歲的Kate Moss。而最勁嘛，冇錯！就係思捷（330）嫌貴棄用的巴西超模Gisele Bundchen，舊年吸金4,200萬美元（約3.3億港元），女王寶座坐足七年，絕對是地上最強！
最令人佩服是佢較上年搵少300萬美金，但收入仍較阿二Orlando Bloom老婆Miranda Kerr高六倍；錢搵到，佢老公亦非等閒，同美式足球員的靚仔老公夾埋，收入勁過畢彼特兩公婆。女王高5呎11驕人身段，精通英西葡三語，未必是大幅拋棄對手的重點，成為「唯一」必須是工作狂和食腦，當年同人字拖品牌Ipanema推出的系列至今已賣出一億對！甚識做生意的她仲着住黑色透視裝賣自家內衣，當然大受歡迎。
每年模界派成績表都像摑思捷一巴，當年嫌女王貴，但賣平一截的H&M卻覺女王有所值，當I.T（999）推出Angelababy系列可賣貴一大截，如當日思捷搵女王賣廣告之餘做埋女王系列可能唔使咁煩，起碼女王品味有保證喇！思捷下周出全年業績，乃是女王被換走一年，業務繼續無力，反而股價在柯大俠坐鎮下生猛，我等閒人隔岸觀火好了。
Samantha
本欄逢周一、三、五刊出
肥佬黎有今日，全賴阿媽細個同佢講過乜？即睇最新一集《亂噏24》，話唔定幫到你！
http://bit.ly/appletalk24