除自拍神器，即影即有Instax都係唔少囡囡極冧愛機，剛發佈的Instax mini 90，靚玩復古Look，男仔用都唔怕姣，加上B快門、重曝、內置近攝等好玩全面新功能，買嚟冧女無得輸！
記者：韓繼聰
攝影：陳國良
模特兒：Daisy Cheung
鏡頭質素大躍進
富士X系數碼機玩復古風都出晒名！想不到連即影即有Instax mini 90，都破掉一直沿用的可愛風，改行懷古Look，砂銀配黑仿皮，少了玩具及少女味、多了專業感，男女合用。
賣相大改，功能亦大提升，即影即有相機收藏達人TM大讚：「雙重曝光及最長10秒的B快門，都大大擴闊了創作空間；雖然我少玩自拍，但內置30cm近攝，相信好多女仔聽到都開心！另外鏡頭質素亦很大進步，相片明顯比以前的細緻清晰，唔再係玩具級質素。」再加上高速快門的Kid Mode、自動調節閃燈兼慢快門的Party Mode等新拍攝模式，功能相當全面。
重曝絕技 手指遮鏡扮藝術
實機測試，小記請來熱愛即影即有的發燒友M-eye作試拍，兼即時教幾招用盡新機能。M-eye試玩幾張後，馬上愛不釋手，還大讚用閃燈影人像加背景時，背景細緻度比舊機清晰很多！
之後當然要玩M-eye的得意技──多重曝光，唔好以為按個掣咁簡單，要影得有美感而不雜亂無章，總有點竅門：「首先最基本係要留意用雙重曝光模式同時，其實亦可作其他設定，例如閃燈、近攝等，記得影第二次時可能要調校不同設定。」
構圖是重曝的關鍵：「因為重曝會加倍曝光，影第一次可先用「Dark」設定拍攝，並預留較暗的空間給第二次曝光，構圖便可清晰一點。」
他更教了一個小秘技，就是用手指遮蓋鏡頭一半來預留黑位，但要留意此方法不要用於近攝模式，否則鏡頭好容易錯誤對焦於手指：「另外，亦可嘗試多用不同形式的構圖，例如直橫度Crossover、遠近攝合併、對稱構圖等。」
B快門方面，除了簡單Set定部機，再用電筒畫光軌外，亦可嘗試移動機身，玩「主動式」畫圖案，這會有不同的效果。見Model一邊即睇M-eye的得意作品，一邊不停讚好兼流露讚嘆眼神，男士們，又有新冧囡招喇！
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange