廖碧兒返大陸拍劇一段時間，前晚喺中環四季酒店出席仁濟慈善晚宴，着咗條超deep V裙大晒八字波，令人眼前一亮，搶盡同場莊思敏、陳嘉桓、陳法蓉等嘉賓風頭。廖碧兒同莊思敏先後同林忠豪拍拖，佢哋被傳媒拉攏影合照同做訪問，兩人表現尷尬，合照時中間有條罅。碧兒話：「我有睇你啲新聞。」莊思敏好緊張咁話：「假嘅，緋聞啲嘢唔能夠亂信。」
諗過借種生仔
碧兒感情未有着落，反而莊思敏𠵱家同葉念琛打得火熱，問碧兒𠵱家係咪好dry？佢話：「冇辦法，之前喺橫店拍咗九個月劇，又去咗美國做選美評判，十月再開劇。」而林忠豪又傳同新歡好事近，佢話：「我唔知呀，冇理人哋啲事，自己就順其自然啦。」而碧兒舊愛陳豪為咗努力搵奶粉錢，日前去咗澳洲同萬綺雯出席活動，吸引咗大批粉絲排隊攞簽名。
趙雅芝喺晚宴上被問送乜畀朱玲玲個孫仔？佢話：「未諗呀，睇相覺得BB好似媽咪。」有傳趙雅芝個仔黃愷傑會入行，佢話仔大仔世界，唔會反對。另外，莊思敏噚日出席荃灣兒童活動，佢話有考慮借種生仔，但又擔心獨力撫養壓力大，問對象係咪葉念琛？佢笑話：「有機會問下，我再澄清唔係（拍拖），我係單身。」
撰文：馮仁昭
肥佬黎有今日，全賴阿媽細個同佢講過乜？即睇最新一集《亂噏24》，話唔定幫到你！
http://bit.ly/appletalk24