【銅鑼灣】梁漢文（梁炳）嘅太太林文慧（Karen）年前患上乳癌，經過年幾治療後已經康復。一直以嚟梁炳都好悉心照顧太太，為佢到處訪尋名醫外，仲成日陪住老婆周圍去，兩公婆經常孖住出雙入對，感情真係好到冇人有。日前記者又見佢哋孖住出巡，Karen睇嚟精神唔錯。
Karen害羞低頭
當日下晝3點左右，梁炳揸車載老婆Karen去銅鑼灣行街，佢將車泊喺利園停車場之後，就挽住兩個名牌紙袋同Karen等𨋢，估計佢之前借衫做嘢，諗住還衫之後再同老婆行街。Karen着住件粉紅色背心襯同色頭巾同灰色短裙仔，感覺好有青春活力，而化咗妝嘅佢精神睇落都唔算錯。
不過，雖然Karen經常陪梁炳出席大小場合，但佢對相機鏡頭依然唔係好習慣，Karen見到記者微笑打完招呼後，即刻好怕羞咁耷低頭，梁炳就幫老婆擋駕話：「咦？點解落到嚟呢度（指停車場）咁犀利呀？」佢見記者影完一輪相之後，就再出聲話：「差唔多啦！」然後兩公婆就孖住搭𨋢準備行街街。
此外，梁漢文前晚喺亞洲博覽館演出「永恒的愛陳百強」紀念騷，佢話：「作為一個忠實擁躉，能夠參與呢個紀念騷真係好榮幸。」
採訪、攝影：黃曉程、李志明
肥佬黎有今日，全賴阿媽細個同佢講過乜？即睇最新一集《亂噏24》，話唔定幫到你！
http://bit.ly/appletalk24