余卓文教授「封刀」餘波之一，就係佢在電台爆料，指威爾斯醫院內缺乏足夠有資格做複雜心臟手術嘅醫生，引起醫管局關注。
香港公立醫院缺乏各類型醫生，非自今日始，公立醫院之數目、醫生、護士人手及病床不夠，已形成醫療樽頸，素來公開透明，不怕向人透露私隱嘅曹Sir仁超大哥在前星期飯局，就講到自己做常規驗身之時，意外地發現患上胃癌，急急走去瑪麗醫院再驗，確認咗，佢想留院做手術，但醫生話俾佢聽：「非最緊急手術，要排隊，約輪候九個月！」曹Sir聽完，不禁講句WTF，冷靜落嚟之後，就去咗養和醫院做手術，切除半邊胃，好彩養和啱啱有空檔，唔係「全院滿座」嘅箒，但普通市民無錢入勞斯萊斯醫院，點算？曹Sir現已無礙，飲食方面當然要比以前小心好多，但外表就睇唔出佢有事嘅噃，個look冇乜變，香港啲醫生確係幾叻，但曹Sir位弟弟係哈佛博士，係港大醫學院教授，但不可在港掛牌做醫生，佢啲學生就可以，故此曹Sir經常話：「本港醫生唔夠，病床唔夠，在公立醫院排隊，可能死咗都未輪到！」
這個問題，上季賽馬時，左丁山在馬場碰到醫管局主席胡定旭，已經向佢詢問過，胡主席拍晒心口，「只要我有足夠醫生，隨時可以加多一千張病床。」去邊度搵多啲醫生嚟呀，醫管局建議過向海外招聘，但被香港醫學會強烈反對，外國醫生自不然無謂貿然申請來港。時下有人成日話新加坡飯香，呢呢，新加坡政府一聲話輸入海外醫生，香港醫生可到新加坡行醫，新加坡醫學會邊度可以反對㗎，香港人就當然可以樣樣都反對！
不少人向胡主席提議，即使不學新加坡大規模年年輸入醫生，香港應該可以逐步進行，例如首先准許所有港人子弟在英聯邦（主要係英澳加紐四國）大學醫科畢業嘅，做咗註冊醫生嘅，都可以返來香港做公立醫院醫生，五年後先至可以選擇私人掛牌。香港現時有不少名醫，大教授之後人，因為知道在英國讀醫科，不能回港，索性在英國讀完中學之後，回港大中大（透過non-JUPAS）醫學院讀書，因佢地普遍成績好，英文好，變相將本地非一流尖子學生擠出局。如果香港可以像1997之前容許英聯邦醫生來港嘅話，呢班人就會留在牛津、劍橋、愛丁堡讀書後回來行醫啦。