【冧客秘技】
福臨門得到華置（127）主席劉鑾雄、東亞（023）主席李國寶等富豪長期光顧，究竟招呼富豪有何秘技？
記者有次在食晏時間，於福臨門二樓電梯口旁邊，突然聽到一位部長用微形對講機，通知三樓貴賓房的同事話「大劉嚟咗」。他應該是收到地下知客通知，再通知有關單位準備，希望做到大劉一出電梯就有人招呼入房。這大概就是招呼周到的第一步。
在福臨門工作28年的營運經理袁新坦言，福臨門成功，主要靠團隊精神，內外溝通良好。
富豪去福臨門未必餐餐鮑蔘翅肚，大魚大肉。袁新透露，許多富豪要求吃得清淡，一定要少鹽、少油。「每張單都會寫明係邊位客人，因應每位客人嘅口味去煮，例如有客人食雞燉翅要清啲，咁就去雞皮，但唔落雞皮無咁香，於是就加啲瘦肉」。
寫菜技巧 不主動提五寶
在福臨門39年的廚師主任劉成補充，「有富豪鍾意食無咁甜嘅年糕、月餅，我哋都會專登為佢整。」
劉成表示，福臨門以傳統粵菜為主，少跟風推花巧菜式，只會推時令菜，例如「每年10至11月左右，大鱔王當造，好多富豪鍾意食大鱔王頭湯，貪佢可以去頭風。」
除出品了得，替客人寫菜也有技巧。袁新指，福臨門有魚翅、鮑魚、花膠、螺片及燕窩五寶，「若有客人請客，佢嘅客到齊，我埋去寫菜，唔會主動提五寶，多數講海鮮。事關隨便一寶都可能過千蚊一位，客人如果唔要，可能覺得無面。又費事佢覺得我哋劏佢，寧願等佢問先講」。
為保持服務質素，福臨門6、7年前開始，要求經理每日紀錄客人的投訴做報告，每個星期四開會檢討，常見投訴是「條魚蒸過龍」之類，亦有人投訴「碗翅細咗」。
面對客人無理要求，袁新通常「嗗」聲吞下，「試過有位富豪包房，我入去寫菜時，佢叫我喺門外等10分鐘，夠鐘入去，佢又叫我喺門外等多15分鐘。真係會火滾。」他透露，有些惡形惡相的富豪，其實十分有禮，「同佢打招呼，佢會應你，又唔該前，唔該後。」確是人不可以貌相。
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange