【光榮結業】
56歲的泳池餐廳大王陳得寶（圖）與維園泳池同年，均是1957年出世，他視維園泳池如親兄弟般，從小一起玩到大。4年前他知道泳池要拆卸重建，明知沒有前景也毅然接手維園泳池餐廳做傳統中菜，「我知道要拆都要做，係希望呢個港人集體回憶，喺我手上結束，留番一個美好回憶。」
帶囡囡游泳作最後致意
大廚兼老闆陳得寶憶述，小時候家住筲箕灣，小三時連同一班同學到維園泳池游水，「我喺維園泳池學識游水，由細玩到大，嗰陣成班野孩子，唔係去泳棚游水，就去維園游。」
人稱寶哥的陳得寶本身經營西灣泳池餐廳10年，擁有國家一級廚師名銜。他說，4年前知悉維園泳池要拆卸重建，毅然花7位數字，接手只有3年租約的維園泳池餐廳，經營中菜，「餐廳舊年11月底到期結束咗，我覺得係值得，呢個兒時記憶喺我手上光榮結束。」
寶哥續稱，維園泳池更激發他創作不少新菜，例如芝士辣大蝦、法國龍蝦海鮮窩等，「我最近投咗馬鞍山泳池餐廳嚟做，9月初正式開幕，我會將呢啲菜式擺喺新店賣，畀啲客人品嚐吓維園菜嘅味道。」維園泳池今日落幕，陳得寶近月帶同讀小三的女兒到維園泳池，教曉她游水，「我哋兩代人都係維園泳池大，今日我會帶埋囡囡去泳池游多一次水，作最後致意，緬懷一番。」
《蘋果》記者
肥佬黎有今日，全賴阿媽細個同佢講過乜？即睇最新一集《亂噏24》，話唔定幫到你！
http://bit.ly/appletalk24