首先來一個鳴謝啟事，前兩天匆忙進出屯門醫院時，竟然跌咗個電話，發現冇咗個電話時已經身在屯門公路，一心諗住係咁先再見我的「唉瘋」時，試下打番轉頭竟然有人聽，聽的還是醫院的管理處同事，「唔使急，慢慢返嚟攞番。」僥倖的失而復得，感謝這位黃小姐。
曼聯唔使用smart phone
電話跌咗攞得番，難度直迫加里夫巴利終於唔去皇馬留番響熱刺，巴利呢單搞足成個暑假嘅轉會，真係婆媽過唔少師奶劇集，唯一好處係熱刺粉絲夠晒時間接受呢個惡耗，終於執包袱起行時，巴利可能發現已經冇乜人送佢，「乜唔係走咗好耐喇咩？」因熱刺球迷發現響唔見咗電話之前，屋企已經多咗十幾個電話任你用。
曼聯球迷就有啲唔同，習慣咗用舊電話，一堆古董電話仲用得，操作良好仲收足5格兼且唔食電，使乜換款啫，傑斯史高斯如是，以前trade咗比人嘅C朗，話想要番，啲感情豐富到呢，然之後朗尼呢款電話周時入水，不時神神哋，更唔係第一次主動要求機主換機，又難得有收買佬摩連奴話明一手交機一手交錢，但球迷們又唔捨得喎，對車路士全場狂叫朗尼個名，叫到天涯海角都終於收到訊號，球迷口水乾時，朗尼都乾埋，眼淚都就摽出嚟，摩連奴見勢色唔對都費事嘥口水，轉個街角收買另一款黑珍珠伊度奧型號好過，反正大減價。
雲格改機狂人
唔好以為雲格好out唔玩手機，其實佢係改機狂人，唔係大牌子係信自己嘅手藝，一部山寨機越獄之後就會不斷提升，所以佢添置咗法米尼2.0，極之可能係打算改造佢打後防，至於羅渣士就直頭話要將轉會期縮短，唔想俾人trade佢部手機，因為佢最近下載咗個新美圖app，一㩒就將蘇亞雷斯變咗史杜列治，立即變黑，非常好使，得咗。
KEYMAN
now TV主持
肥佬黎有今日，全賴阿媽細個同佢講過乜？
即睇最新一集《亂噏24》，話唔定幫到你！
http://bit.ly/appletalk24