遼寧全運會噚日開幕，「山地興」陳振興今早強勢出戰男子山地單車賽，力爭香港今屆第1金！最後一次參加全運嘅山地興狀態「弗」爆，總教練沈金康稱讚呢個徒弟越老越辣，心理同技術都係歷來最好，希望順利打響頭炮！
32歲嘅山地興計劃出年仁川亞運後退役，上屆全運佢只攞到銀牌，今屆當然想「坐正」啦。因為今朝11點就要比賽，佢冇出席噚日嘅開幕禮，走咗去賽場練習轉彎。位於白清寨嘅賽道出名多急彎，來自安徽、遼寧、雲南同河北嘅主要對手，都話呢條賽道難度高，而山地興轉彎技術一向都好好，所以對佢極之有利；不過呢位奪標熱門就話，唔會受任何言論影響，「自己（心態）比以前穩定咗，不過喺比賽期間，仍然要好謹慎，唔好有差池。」
沈金康：好大機會贏牌
山地興年過30，沈教練讚佢體力冇乜下降，心理同技術仲更加成熟，有信心今日有好成績，「廣州亞運攞金牌後，佢有一段時間作調整，技術同心理都有進步，今次的確有好大機會贏獎牌。」
另外，上屆掃走1金2銅嘅馬術隊，亦係香港嘅爭金希望，隊員林立信、鄭文傑、賴楨敏同林子心噚日朝早到賽場練習，全程只騎馬慢踱，冇練跳欄，留力出戰聽日嘅場地障礙賽團體賽。德籍教練Bexten話：「我哋到埗後練咗3日，無論選手同馬匹都適應得好好，比起4年前，港隊𠵱家實力更強。」
耿曉靈持旗勁緊張
噚日下晝嘅開幕禮以環保、樸實為主題，自1987年以嚟，首次喺日間舉行，亦冇著名歌星同藝員表演。港隊327人嘅代表團，由武術世界冠軍耿曉靈擔任持旗手，佢話入場嗰陣好似比賽一樣咁緊張，「第一次參加開幕禮，做持旗手係人生中一個難忘經歷，緊張程度拍得住比賽！」特約記者遼寧直擊
肥佬黎有今日，全賴阿媽細個同佢講過乜？
即睇最新一集《亂噏24》，話唔定幫到你！
http://bit.ly/appletalk24