【隔牆對論】
記：《蘋果》記者
李：退休警司李仕光
記： 林老師罵警事件，是否源於警察執法不公？
李：咁旺角有兩派人，一批支撐A，一批撐另一樣嘢，呢兩批人出現，咁你會點做吖？咪將佢哋分開囉。咁呢個林慧思呢，佢要過（封鎖線），如果（警察）執行緊職責，你一定要入嚟，咁呢個係干擾咗警方執行職務。好似啲人拍緊戲，有個人故意走入鏡頭度，咁你會點？
你話執法係咪公道呢？總之警察就係分開佢，唔好畀你過，就係咁多。過咗，隨時你有危險喎。我覺得差人處理冇問題。曼聯對利物浦，鑊鑊都打交㗎啦，放埋一齊，又天水圍事件啦。
記： 但當日處理法輪功攤位，是將兩批人分隔，是否對他們作出封鎖，變相壓制某些團體的表達自由？
李： 我睇番條片，有啲人話唔應該打壓佢哋。咁除咗旺角，你有冇見到法輪功喺紅磡火車站都有（擺街站）。如果要打壓，我哋根本平時都可以話佢阻街啦。將兩批唔同政見、訴求人士分隔，我覺得做法係正確。
旺角反林老師撐警察集會、梁振英落區場外示威，警察被指執法不公，挺警、挺梁人士向記者、反梁示威者施襲，但軍裝警員沒即場拘捕。
記： 警察在天水圍事件現場放走打人的挺梁分子是否不妥？
李： 如果有啲人想參與（集會），冇將意圖話畀警方聽，我哋冇辦法知道。啲人額頭冇寫住「我諗住打嗰班友仔」。普通後生仔，我哋點可以知佢有暴力傾向？當有暴力事件發生，警方將佢哋分隔。啲人唔知道警方當日部署。如果我哋派咗30個警察，要拉呢班人，就會冇咗20個（警員），剩番呢批人足唔足夠維持（現場秩序）呢？咁咪之後採取咗拘捕行動囉。可能係分隔咗佢哋先，再慢慢拉人，唔係呢度再有打交，佢哋死梗㗎喎，呢群差人目的係先維持秩序。批評（警察）嗰啲人，佢哋唔知乜嘢係警察，佢哋淨係識寫啫。嗰班後生仔有冇寫住反梁、撐梁、我係黑社會？你亦都唔能夠歧視我係金毛、紋身。
記： 警察沒有即時拉人，是否執法不力？
李： 咁我哋現場有幾多人拎攝錄機你唔知啫。喺現場咁多人圍，我可唔可以睇得到邊個打？可能打交嗰一下搵唔到，例如𠵱家我打你一拳，你還拖，（警察）擰轉頭時，見到你打我，係咪拉咗你先吖？咁我哋將佢分隔咗先，再搵證據囉。有好多嘢要兼顧，你一定要體會得到，𠵱家前線嗰啲人受太多批評。
記： 換轉是黑社會元老出殯，O記早在靈堂外高調拍攝、查身份證。今次大批疑似黑漢聚集，警察為何任由他們生事後離開？
李： 刑事情報，有時情報搜集得好，有時搜集唔到，否則，冇911事件。咁係咪有情報，就要圍住晒啲人呢？咁佢哋都要表達訴求喎。我知道坊間有啲指控話搵啲黑社會保護特首，你諗吓，如果有警察同黑社會講，我哋警方唔方便出馬，你去𡁻嗰班友仔，咁你第日屈我就死啦：「喂，阿Sir，我班兄弟有麻煩呀，我幫你，你𠵱家要赦我。」咁我哋以後唔使做嘢啦。𠵱家唔係以前呂樂時代，警務人員唔會咁做。
記： 你是否贊成引入辱警罪？
李： 差人出多幾千蚊人工，個娘親就可以畀你問候埋？𠵱家講粗口，喺機場、地鐵係犯法。根據法例，喺公眾地方喧嘩或使用辱罵性行為，可能導致社會安寧受破壞，係「公眾地方行為不檢」。你可能話我偏幫啦，我覺得，應該有辱警條例。當警察係執法，如果你辱罵警察去阻你執行工作，呢個應作出規管。
記：阻差辦公已能作出保障？
李： 阻差呢，有技術困難，喺香港（告）阻差，如你只係鬧，冇阻我做嘢，好難（告）。例如我係差人，問你攞個身份證，你話「我乜你呀」，但你完全冇阻我做嘢，只係挑戰我：「香港法例邊條講呀？」如警方真係行使合法公職時，有啲人困擾到佢，我覺得應該立法。
記：警察可否參與政治活動？
李： 我覺得應該放寬，點解警察就冇咗人權去表達意見？舉個例，若果有個辱警罪立法公眾論壇，咁係咪政治活動？咁都可能係個政治議題喎，隨時又中喎。警察係最後一個守龍門，政治要中立，不過都要保障到佢哋表達訴求自由先得。（退休總督察）廖潔明嗰時參選（區議會），啲人喺宿舍叫選佢啦，代表我哋聲音。咁成個宿舍都可以拉晒啦，呢個仲唔算政治活動？
mailto:[email protected]
肥佬黎有今日，全賴阿媽細個同佢講過乜？即睇最新一集《亂噏24》，話唔定幫到你！
http://bit.ly/appletalk24