《情逆三世緣》已經由宋代包青天年代去到五十年代嘅香港華探長年代，其實呢個劇，只係講宋代，穿崩同唔合理位真係多如繁星，原來皇宮花園驚現鐵欄同彈弓床已經係小事，之後仲有音樂盒同夜視望遠鏡；但話佢先進呢，又先進唔晒，如高繼安(黃智賢)用西域七星蜈蚣毒害歐陽震華，竟然只係用一種特別嘅草做引，就可以將遠自西域嘅七星蜈蚣引到去汴京，真係勁。
去到五六十年代，穿崩應該少啲，不過噚晚嗰集就有一個亮點，就係獅子山下體——現香港精神。話說尾段時歐陽震華揸車載黃智雯上山頂遊車河，咁當然要留影啦，先嚟一張——就係獅子山下體現香港精神，仲有天星碼頭、香港會所同鐘樓。但，全部都係key圖嚟0架嘛，soft咗佢或blur咗就算，但點睇，都「逼真」過家陣尖沙嘴星光大道嗰幾塊巨幅「藍天與白雲」假圖嘅。
不過冇辦法啦，特區政府最叻係乜？係拆。拆。拆。天星碼頭要拆。皇后碼頭要拆。阻礙發展嘅都要拆。你叫無綫去邊度搵番呢啲景？除咗key，仲可以點？咪就係返內地拍，佛山嘅「西樵山夢工場」。黃秋生套《葉問——終極一戰》，都係喺呢度拍。《情逆》嘅五十年代場景，就係呢度拍。
「西樵山夢工場」位於佛山旅遊景點西樵山山腳，係借鑑浙江橫店打造嘅影視城，既租借俾人拍戲，亦係旅遊熱點，遲吓仲會有拍攝基地、酒店、表演場館及黃大仙祠等景點。而《情逆》中嘅九龍寨城景區，依家已開放緊，所有街景、商店、唐樓，都係依照歷史1:1而搭建，走馬騎樓，飛髮舖，大排檔，以至街招，招牌，都係有根有據。就連以前店主收錢用的煉奶罐都有。
舊時香港，竟然要喺佛山重現。但係呢，場景中嘅坑渠蓋，就未免太現代。而且，星期四有場戲講歐陽震華由九龍城警署去到宋王臺，竟然見到架5號中巴，仲係去堅尼地城。係，由1933年6月開始，5號線的確由中華巴士經營，來往大坑至堅尼地城。但係，唔係行經九龍城，而且50年代(《情逆》年代應為1953年左右)都未有海底隧道，根本唔合理。但原來呢架巴士，係「西樵山夢工場」駐場道具，次次有親巴士場景，都係佢出動，而且都係5號車去堅尼地城。所以冇計。
肥佬黎有今日，全賴阿媽細個同佢講過乜？即睇最新一集《亂噏24》，話唔定幫到你！
http://bit.ly/appletalk24