近日無綫播緊關詠荷同歐陽震華主演嘅《情逆三世緣》，當中轉世橋段雖然有啲老土同難以置信，不過隔代人有相似事件又可能真有其事，近日網上重掀起一片「人有相似」嘅人肉搜尋遊戲，最為驚人嘅大發現，可算係近嚟主攻內地拍劇嘅羅嘉良。有網友指嘉良似足已故中國共產黨黨員、曾從事革命活動嘅賀瑞麟（1909-1928）。
距34年出世
嘉良喺賀瑞麟死後34年出世，不過二人五官氣質好似餅印一樣，都達到99％相似度，令人難以置信，亦唔排除有網友惡搞改圖成份。
根據資料顯示，賀瑞麟1909年生於江蘇銅山，做過共青團南京市委書記，率領過東大附中學生參加聲援和記蛋廠工人大罷工示威遊行而被捕。出獄後就開始專職從事革命活動，多次被捕入獄。1928年7月喺南京被捕，同年10月喺雨花臺被處死，短短19年嘅人生都算轟烈。
此外，網友亦搵到古巨基同國父孫中山似樣，而外國組別則有奧斯卡影帝尼古拉斯基治，粗眉憂鬱眼神似足陳年吸血殭屍舊相。
撰文：馮仁昭
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！