【隔牆對論】
近年示威遊行集會，屢爆警民衝突，最終法庭相見，林慧思辱警事件，警民埋身肉搏。民陣警權關注組召集人王浩賢批評，警方視示威者如罪犯，將遊行人士抹黑成滋事阻街，只因警隊高層滿腹政治考慮，早已淪為極權幫兇。
退休警司李仕光為警隊護航，認為批評警隊的人，不懂警隊運作。警員受辱受罵，情緒幾乎爆煲，訂立辱警罪、容許警員政治表態，未嘗不可。
記者：雷子樂 姚國雄
記：《蘋果》記者
王：民陣警權關注組召集人王浩賢
今年7月，法輪功在旺角行人專用區的街站被青年關愛協會示威者用橫額包圍，警方接報到場，只築起封鎖線圍住兩個團體，但對青關會的行為坐視不理。路過的林慧思老師認為警察執法不公，走入封鎖線與警員理論，其間曾爆粗「What the fuck」。影片放上網後左派聲討老師講粗口，特首梁振英要教育局交報告，但對警察當日的處理手法避而不談。
記：林老師罵警事件，是否源於警察執法不公？
王： 法輪功擺街站，青關會走去挑釁法輪功，用布去圍住法輪功，警方嚟到時，只係拉起封鎖線圍住兩批人，但就乜嘢都唔做，警方將成件事變咗係個擂台，將市民變成觀眾，任由法輪功同青關會對峙，唔係好嘅做法。
林慧思見到警方乜嘢都唔做，所以講粗口鬧警察，因為佢見到好唔公平嘅事情發生，見到警方身為執法者，但做法與自己嘅期望有好大落差，一怒之下，先有咁大嘅情緒反應。
法輪功和青關會在旺角對峙，警方被指袖手旁觀；左派搞「反林慧思」集會，休班警員出席被指有違政治中立；梁振英到天水圍、觀塘「做騷」，警方任由懷疑是黑幫成員毆打示威者，並空群出動逾400名警員、逾30輛警車佈防。
記： 自梁振英和曾偉雄上場，警方執法與以往分別在哪？
王： 警方處理遊行集會，點樣對付示威者、點佈防、採取乜嘢策略，係督察級或者更加高層去決定，前線警員都係跟order做事。警權問題上，對焦點應該係針對警隊嘅管理層，究竟佢哋係用乜嘢態度去處理遊行集會，係咪一早已視示威者做洪水猛獸、破壞社會安全？
曾偉雄、梁振英上場後，警隊對付遊行示威越嚟越強硬。2011年，有400幾位示威者被拘捕，破晒紀錄，警方使用武力、胡椒噴霧，力度越嚟越重。曾偉雄上場後，用《公安條例》去告示威者。係咪23條未嚟之前，警察已開始用《公安條例》演練、試兵，加強對遊行施加限制？呢個情況令人擔憂。
記： 你與警方交手多次、參與多次遊行示威集會，更曾遭警方拘捕檢控，你認為警方近年執法是否多了很多政治考慮？
王： 近年遊行集會，警方最常用嘅手段，就係將好多權利對立。例如警方強調要平衡道路使用者嘅權利，所以即使幾十萬人上街，警方都唔肯全面封路或者改道，令到示威者走唔到，啲車又塞住，製造一般市民同示威者嘅權利互相矛盾，將示威者打造成影響公眾安全嘅人。警方就可以攞住個理由，去強硬執法，同時令市民對示威者反感。
警方近年將遊行示威人士當成罪犯，例如遊行去中聯辦，警方用幾重鐵馬強大佈防。警隊除咗維持公眾秩序同安全，係咪多咗政治考慮？連警隊都有政治考慮，呢個就係市民最反感，因為香港核心價值，係警方應該擔當持平執法者。
舉個例，長毛喺替補論壇畀人叉頸，影埋相，有晒證據，警察兩年來都冇跟進。愛字頭班人出現，打記者都係不了了之。市民都會感覺點解警方偏幫某啲人士，但示威人士卻要面對警方嚴苛對待呢？
記：你認為梁振英為何如此強硬支持警隊？
王： 一個冇認受性嘅政府、特首，施政舉步維艱，冇辦法回應市民訴求。點樣可以維持管治呢？睇吓外國一啲專權國家嘅經驗，就係用警隊或者軍隊，梁振英要壓制示威者嘅反對聲音，既然自己施政回應唔到民意，就惟有用警隊，梁振英咁高調支持警隊，佢可能未來會用維持社會安定嘅藉口，要求警隊喺遊行集會做更加多嘢。
記： 有警員不滿常遭市民用粗口辱罵，你認為香港需要訂立辱警罪嗎？
王： 𠵱家嘅阻差辦公同襲警罪，已經賦予警方足夠權力，安全執行職務。如果引入辱警罪，即係市民冇禮貌已經觸犯法例，咁係將香港變成警察社會，由警方嚟維持道德，要警方做道德審判者，市民違反道德竟然要拉去接受審訊，喺香港一個自由嘅社會，係非常之恐怖。
如果市民對警方講粗口就被判辱警，咁掉番轉頭，每年警察投訴科收到幾百宗市民遭警員不禮貌對待、同市民講粗口，咁係咪警員都要接受刑事檢控先？我相信社會都唔想香港變成作法自縛、用高壓方法去管制每個人嘅情緒嘅地方。
mailto:[email protected]
肥佬黎有今日，全賴阿媽細個同佢講過乜？即睇最新一集《亂噏24》，話唔定幫到你！
http://bit.ly/appletalk24