【大坑】 唔經唔覺，鄭秀文（Sammi）同許志安已經復合兩年，經常見佢哋出雙入對，好似新婚夫婦咁甜蜜。
之前有報道指安仔趁住Sammi喺渣甸山租住嘅地方被迫遷，即刻二話不說車晒Sammi啲家當去自己干德道嘅屋企，兩個人同居咗個半月，都冇發生相見好同住難嘅問題，睇嚟差唔多入直路，隨時可以結婚。雖然人生展開新一頁，不過佢哋依然好長情，特別係對大坑嘅美食。
熟路後門出入
前晚7點鐘，Sammi同安仔又去咗大坑鮨辰日本料理，佢哋對呢間日本菜館情有獨鍾，唔止經常拍拖嚟撐枱腳，安仔仲試過招呼未來外父一齊嚟開餐，順便見吓家長。安仔呢晚揸平治C63跑車，好熟練咁泊咗喺餐廳後門，兩個跟手喺後門入去開餐。
餐飯食咗成個鐘，Sammi同安仔先心滿意足離開，Sammi一馬當先喺後門出嚟，雖然見到有記者影相，不過依然冇影響心情，仲戴番副太陽眼鏡任影唔嬲，至於殿後兼孭住個大袋嘅安仔就好幽默咁話：「你又喺度呀？」然後就上咗司機位。睇嚟佢哋心情好興奮，上到車仲不停笑，直到開車同記者揮手嗰一刻都仲笑緊，似乎佢哋嘅同居生活過得好愉快。
採訪、攝影：楊浩賢、吳耀輝
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！