美國重返亞洲，菲律賓總統有老美撐腰，拒絕向港人致歉賠償。最明顯係不遲不早，偏偏在佔中運動出現後，美國撤換駐港總領事，由北韓六方會談美國代表夏千福來港，如此重量級人物，必定係有所圖，背後配合佔中運動，將香港變作顛覆基地。夏千福上場後，不遲不早，偏偏在梁振英民望最低殘時，高調進行自我宣傳，不但效法千古罪人彭定康，周圍去食地道食品，亦拜神拜廟，又學陳茂波做鍵盤戰士寫網誌，呢個夏千福一定有不可告人之政治圖謀。
夏千福來港 必有所圖
可能最終拯救689要靠呢位「老千福頭」，因為要扯高政治矛盾，逼建制派及北京歸邊，成為挺梁骨幹，單靠挑動香港內部矛盾，實在力度唔多夠。批鬥林慧思、ICAC、通識教育，全部都冇太大效力，來來去去都係同一班人，連民建聯、工聯會都唔落叠，出口挺梁，有多少保持距離意味。如果要加大力度，恐怕要靠夏千福了，將本土內部矛盾升呢、成為中美鬥爭，咁就有力得多。
首先要幫黨出聲，將佔中要從美國重返亞洲戰略高度去定位，背後一定有美英勢力撐腰，尤其夏千福竟然跟從本土派，將內地譯音弗吉尼亞改為本土粵語拼音維珍尼亞，暗撐本土派，甚至明撐龍獅旗，本土派將林慧思事件搬到白宮，要美總統出手，仲唔係同夏千福眉來眼去。佔中背後涉及美國重返亞洲，香港更加不能亂，大家要團結在梁特下，槍口一致對外。
其次係要小心美方勢力入侵學民思潮，學民有幾多骨幹會到美國名牌學府升學，而佢哋不遲不早，偏偏呢個時候提出全民提名選特首約章，逼民主公民兩黨就範，明顯係重施當日肥彭故技，提出違背基本法方案，將民主派綁上反中亂港戰車。以佢哋咁細個，九二政改方案還未出世，冇理由知道肥彭鬥爭史，背後一定有人教路。
仲有呢排港英殘餘勢力蠢蠢欲動，先有施祖祥駁斥梁特ICAC舉報道歉論，復有李澤銘公開支持施祖祥反擊張志剛，仲未計通訊局竟然針對走良心路線嘅ATV，完全唔念ATV反學民挺國教立場，仲唔係迫害愛國愛港媒體，難怪政總集會要愛港力群眾出手。
香港當前正處於鬥爭風浪之頂尖，走錯一步，萬劫不復，香港必定成為顛覆基地。
以上內容全屬本人虛構出來的一派胡言，志在呃稿費，不過偏偏就有人認為係事實，試問香港點會有真正和諧社會！因為香港和諧，根本就唔符合美國重返亞洲的戰略思維嘛！
添馬男
肥佬黎有今日，全賴阿媽細個同佢講過乜？即睇最新一集《亂噏24》，話唔定幫到你！
http://bit.ly/appletalk24