性感女神舒淇自認宅女，最嚮往過着只睡、玩、游水、曬太陽的逍遙日子，日前她與時裝美容雜誌《add》分享女人的矛盾，現年37歲的舒淇坦言，曾想過打botox瘦面，不過卻怕有副作用，她說：「我想打瘦面針，但同事勸我呢條係不歸路，越做越多，老咗塊面皮膚會下垂，又要花錢做手術拉皮。」至於感情生活，舒淇不介意身邊沒男友，但心底卻盼望找到一個能夠心靈溝通的伴侶，她說：「細個鍾意高大英俊，想男友似劉德華，人大咗就會注重優點，樣貌只係軀殼，才華同錢都唔重要，最緊要心靈可以溝通，搵到個有默契嘅伴侶。」
拒妥協組家庭
雖然身邊好友紛紛結婚，但盛女舒淇卻不為所動，她說：「結婚只係一種形式，最重要係搵到一個你好想好想同佢結婚、生小朋友嘅人，不過拍戲佔咗我好多時間，而我嘅性格係唔易妥協，應該唔會走入家庭，現代女性獨立又賺到錢，冇男朋友都唔重要，如果搵唔到，不如自己一個人生活，𠵱家女人叻過男人，唔需要委屈自己，夾硬搵一個唔愛嘅人結婚。」
身為性感女神的舒淇，還自嘲私下是宅女，平日放假會打羽毛球、保齡球及健身：「我覺得自己越來越宅女，四、五年前仲開始夜晚6點後唔食嘢，所以少咗同朋友出去食飯，我唔覺得自己性感，心目中法國女星蘇菲瑪素就好性感，40幾歲依然保養得好靚好自然。」（詳細內容請參閱第十八期《add》）
此外，正在享受假期的舒淇，昨日在微博上載一張看百老匯音樂劇《Wicked》的相片，身為影后的她，表情多多在恐龍像前扮鬼扮馬影相，非常搞笑。她有感而發留言：「I wish I could sing and dance like them.」看來舒淇對演音樂劇很有興趣。
撰文：唐如
肥佬黎有今日，全賴阿媽細個同佢講過乜？即睇最新一集《亂噏24》，話唔定幫到你！
http://bit.ly/appletalk24