賭王千金、有賭后之稱嘅何超瓊Pansy，係香港女童軍總會副會長，八方最近收到消息，指Pansy蠢蠢欲動，有意喺年底角逐總監一職，做女童軍一姐！咪以為賭后一出，其他人即縮，八方聽聞總會內有人覺得Pansy唔係太適合，賭后隨時出師不利。
女童軍總會今年10月15號舉行「會務委員會特別大會」，屆時會舉行新總監選舉，因為現任總監彭徐美雲任期至明年4月26日屆滿，總會係時候搵接班人。
就喺呢個時候，政圈忽然傳出原本已經係副會長嘅Pansy，有意競逐總監一職。到底有乜嘢原因令賭后去馬？八方道聽塗說話Pansy好有心，想為女童軍做多啲嘢，而賭王何鴻燊曾任女童軍副會長多年。
到底總監做啲乜？總會發言人話，呢個位係義務性質，職能包括推廣香港女童軍運動。嘩！有賭后Pansy做生招牌，業務點會唔發揚光大？咁點樣可以喺選舉脫穎而出？原來總監由女童軍會務委員會嘅當然委員提名，並經會務委員會投票選出，唔係女童軍一人一票選出。
被嫌感情生活太精采
咪以為Pansy去馬，一定冇阻滯，八方聽聞總會內有人指Pansy日理萬機，加上感情生活多姿多采，恐怕難以兼顧喎。可能聽到反對聲，近日有傳超瓊未必親自出馬，或者支持𠵱家係女童軍名譽副會長嘅胞妹超鳳去選。總會發言人話冇收到Pansy競選消息，但歡迎對女童軍運動有熱誠嘅人參選。
mailto:[email protected]
肥佬黎有今日，全賴阿媽細個同佢講過乜？即睇最新一集《亂噏24》，話唔定幫到你！
http://bit.ly/appletalk24