權力使人迷失本性！敍利亞總統巴沙爾為對付國內班反叛武裝份子，唔單止要兵戎相見，上個禮拜仲出埋化學武器，連手無寸鐵嘅平民亦唔放過，視人命如草芥，西方國家遂齊聲譴責，英美更牽頭部署發動空襲懲戒巴沙爾政權，槍聲未響，環球股市就先被震散，油價金價則受地緣政治因素推動雙翼齊飛，成最大贏家。
查實，敍利亞本身並非產油大國，但地理上就與伊拉克相鄰，市場最擔心嘅係，歐美同敍利亞開拖會殃及池魚，令伊拉克等區內產油大國嘅供應受阻，搞到油價呢個禮拜急彈，紐約期油衝上每桶112美元，創逾兩年高位，期油合約交易近日更大增，氣勢一時無兩。
金價再大升有難度
不過，據傳媒消息講，美國總統奧巴馬旨在向巴沙爾作出小懲大誡，無意趕盡殺絕，費事逼虎跳牆禍及成個中東，所以有理由相信，今次危機爆大鑊嘅機會唔大，油價近日上升可能係虛火。
首先，美國近年積極發展頁岩氣後，對原油進口嘅需求大減，連中東股神阿爾瓦利德王子，早前亦呻中東將來唔可以再單靠賣油為生，加上金磚四國經濟開始走下坡，原油需求增長放慢，淨係睇呢兩個因素，已經反映油市前景未必係咁好，候高位沽油應該有得博。
同樣地，因為黃金係稀有金屬，所以古往今來每逢有戰亂，都會係搶手貨，今次敍利亞危機自然係利好金價，加上近排有番啲鑊氣，所以早兩日就到每盎斯1,433美元，創三個月高位，短期係地緣政治因素影響下，應該無咁快散band，但由於之前支持金價的利好因素已經有變化，未來要再創高𥧌相信唔係咁易。
事實上，金市連升12年後，今年強勢不再兼搖搖欲墜，而聯儲局主席伯南克5月爆響口講退市後，加上美國同日本擔心通縮，終於觸發金價大調整，令今年一度累跌近三成，中途有唔少中國大媽以為執到寶，起勢趁低吸，點知金價不斷尋底，6月底跌到1,180美元至見底反彈，嚇親唔少大媽。
正如股神畢菲特話齋，作為投資產品，黃金最大弱點係冇息收，過去12年升到你唔信，主要係市場炒作環球低息政策，最終會引發通脹惡魔重臨，加上金磚四國崛起，多咗人買金飾或投資保值。但隨着聯儲局部署逐步退市，金市少咗炒上嘅一大誘因，加埋歐美經濟轉佳，今年投資股市嘅回報率會遠勝黃金。
照咁睇，除非環球市場爆發黑天鵝事件衝擊美國經濟，否則儲局啟動退市下，環球債市應該有跌無升，套息交易拆倉下，印度等新興市場繼續被洗就唔再講，黃金等資產價格亦唔慌會好得去邊，不過，如果世界出現大亂則另計。
奇兵
本欄逢周五刊登
肥佬黎有今日，全賴阿媽細個同佢講過乜？即睇最新一集《亂噏24》，話唔定幫到你！
http://bit.ly/appletalk24