上季玩完馬後炮，今季就做預言家，同大家一齊睇吓嚟緊周末有咩好睇。今周主題：利物浦對曼聯
對於韋碧克嘅印象，首先係來自一段雲尼斯達萊教踢波嘅片段，話說雲佬踢緊曼聯嗰陣，教十幾歲嘅韋碧克轉身，而韋碧克學得好快，仲畀雲佬讚㖭。眨吓眼，韋碧克已經大個仔，但出道呢幾年不斷被人批評，甚至有球迷仲拉埋佢師父雲佬落水，話雲佬剩係識教佢轉身，唔記得教佢射門。
的確，韋碧克嘅埋門質素真係冇眼睇，但佢唔係技術差，而係唔識點處理，唔識把握起腳嘅時機，又用唔啱射門方法。但講真，除咗射門呢瓣弱啲，韋碧克其他方面都唔錯，係個潛質優厚嘅前鋒。首先，韋碧克傳波都唔錯，今季聯賽傳球成功率有84%，高過朗尼同尹佩斯，而上季佢嘅數字仲去到86%，係曼聯中前場入面名列前茅。須知韋碧克活躍於對手腹地，同隊友打唔少one touch，所以佢呢個逾8成嘅成功率，絕對唔係橫傳同後傳刷番嚟嘅數據。
另外，韋碧克非常勤力，唔介意走上走落，聽從教練安排，就好似上屆歐聯16強對皇馬，費格遜搵佢看管沙比阿朗素，佢真係可以搞到沙比全場無啖好食。如果曼聯中場繼續唔增兵，韋碧克肯定會越來越重要，因為紅魔𠵱家班中場跑動能力弱，要前鋒多啲返後幫手。近十年足球戰術時有變革，如派路嘅攻中當防中、基斯坦奴朗拿度翼鋒當中鋒，話唔定韋碧克可以憑前場清道夫呢個位殺出血路。文：咖喱
肥佬黎有今日，全賴阿媽細個同佢講過乜？即睇最新一集《亂噏24》，話唔定幫到你！
http://bit.ly/appletalk24