【中環→觀塘碼頭】謝霆鋒噚日33歲牛一，近排佢忙緊同周潤發拍王晶執導嘅新戲《賭城風雲》，連生日前夕都要開工，前日傍晚6點幾，霆鋒坐保母車離開中環半山寶雲道寓所，直去觀塘碼頭上船出海拍攝。
婷婷：哥哥Love u
戴cap帽踢拖嘅霆鋒，雖然生日前夕都着到全身黑色，佢落車時隻手仲揸住支大雪茄，襯番晒佢製作公司老闆身份，霆鋒chok住落船，直至晚上8點幾劇組都未回航，睇嚟佢要趕拍夜戲，喺工作中迎接生日。
噚日下晝4點幾，狄波拉帶愛心湯嚟探霆鋒，問送乜畀囝囝做生日禮物？拉姑笑笑口話：「呢份咪禮物囉。」不過就唔見Lucas同Quintus嚟同老竇慶祝，原來張栢芝帶咗兩個仔移民溫哥華，日前三母子現身Surrey區飲茶，有消息話栢芝喺嗰度買咗三千呎大屋，仲幫囝囝搞咗入學手續。
另外，謝婷婷噚日下晝喺微博擺兄妹相留言祝福：「哥哥生日快樂！ Love u」經理人霍汶希亦發微博：「謝謝各位鋒蜜的祝福！你們的boss還在船上拍戲過生日呢！」至於同霆鋒傳緋聞嘅周迅就冇影，真係避嫌避得好徹底。
採訪、攝影：羅德光、陳志嵐、楊浩賢、吳耀輝
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！