鄧麗欣（Stephy）竟然塞自己入行李篋，仲俾人喺中環蘭桂坊拖行，原來佢咁大膽犧牲色相瞓街，係為咗幫攝影師好友顏米羔搞嘅慈善相展StepFree做model，噚日Stephy接受馮仁昭電話訪問，佢話：「個篋雖然有36吋，但厚度唔夠，之前我要拉筋先塞到自己入去。」
夾到好痛
拍攝當日，着短褲嘅Stephy吸引大批途人圍觀，佢話：「最辛苦係要伸隻手出嚟，俾個篋夾住好痛，又要俾工作人員拖篋行上斜路，真係好恐怖，聽到出面好多聲，裏面又好焗，唔可以太長時間，唞唔到氣。」Stephy話呢張相表達好想出走嘅心聲，有時壓力好大想一走了之，但始終冇做到。
今次慈善相展同願望成真基金合作，9月19至22日喺時代廣場舉行，Stephy話：「自己今年30歲，好希望想做唔同嘗試，踏入呢個年齡想表達訊息，以前出過寫真同書，今次就做model影咗十幾張相，每張相都各有意思。」
撰文：馮仁昭
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！