美國總統奧巴馬表示，仍未決定點樣回應敍利亞化學武器襲擊事件，仲話介入當地內戰，其實無補於事，開火機會隨即冷卻，港股亦順勢反彈。不過，奧巴馬咁樣講，或者係同其他國家未傾掂數有關，問題一日未解決，地緣政治風險隨時會再升溫。
中東進入戰事mode，油金價齊齊發難，金價由6月底低位計起，累積升幅已逼近兩成，本地金飾股亦聞雞起舞，周大福（1929）、周生生（116）、六福（590）期內分別反彈38%、39%及56%，六福明顯跑出，皆因其對沖金價策略最進取，睇好金價go go go，六福值博率最高。
今年第二季，金價跌到一仆一碌，金舖顧客仲多過花市，成功帶動六福生意強勁增長，港澳同店銷售增長83%，內地市場更達117%，雖然毛利率錄得低單位數下跌，但成功以量取勝，期內黃金產品零售業務收入及毛利，齊齊增長逾倍。六福現價PE 12.1倍，較周生生嘅14.4倍及周大福嘅19.4倍，分別折讓16%及38%，估值平絕同業。六福噚日收報26.05元，升3.4%，成功突破25元阻力，投機性買入，短線目標挑戰年初密集區28至29元，潛在升幅約一成，失守24元止蝕。
唐牛
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange