華人置業主席劉鑾雄（大劉）將灣仔福臨門當作飯堂，別以為這位超級富豪只愛鮑參翅肚，其前御廚星爺爆料，原來大劉也愛咖喱等平民菜。星爺一生經歷大起大跌，靠咖喱成名，卻在金融風暴、沙士損失過百萬，屢戰屢敗，卻也越戰越勇。蟄伏10年，「咖喱星」今年在中環捲土重來。 記者：潘婉玲 攝影：中環特工隊
「咖喱星」5月開業，瑟縮於皇后大道中一個商場，店面連廚房面積才200呎，從招牌到職員制服一律鮮黃色，搶眼得很。一名身穿廚師服、頭髮灰白的男子站在店外，拿着傳單向客人介紹，他是廚師兼老闆，自稱星爺。
電影界的星爺周星馳撮合了大劉跟甘比的一段姻緣，飲食界星爺則服侍過大劉的肚皮。六、七年前，華人置業登報招聘廚師，月薪達三萬，面試地點就在華置的私人廚房，星爺當刻才驚覺，要服侍的正正是主席大劉，「填form嗰刻先知，佢即時叫我炒幾樣嘢，我唔驚，我有咁嘅能力！」最後成功揮低其他應徵者，成為大劉御廚。
一個月煮足30款 最愛豬牛尾
富豪嘴刁是意料中事，更何況主子把灣仔福臨門當飯堂，吃慣鮑參翅肚。「佢有架私人直升機，有時搵人飛過去（澳門）買魚翅返嚟叫我整！」對於身家逾500億，名列英國富豪榜第14位的大劉來說，食魚翅等閒到極，令記者嘖嘖稱奇的，反而是大劉也愛咖喱這等平民菜，「每日一款，咖喱牛、咖喱羊、咖喱豬，一個月煮足30款，甘比同呂麗君都鍾意食。佢（大劉）鍾意咖喱牛尾、豬尾，鍾意食爽口嘢」。
星爺偶爾也要親自上菜，與大劉有過幾面之緣，卻從未交談，大劉對其廚藝也不置褒貶。伴君如伴虎，御廚當了不夠一年，星爺選擇重歸平淡，究其原因，滔滔不絕的星爺即時封口，「你係記者，我唔會同你講」。老人家難服侍？「唔係幾好啦！」
回顧星爺的人生路，雖稱不上曲折離奇，但也絕對大起大落。1995年於荃灣創業賣咖喱，店子取名咖喱星，標榜以38種香料炮製，吸引傳媒採訪，好不威風，雄心壯志買下同區兩個舖位，計劃包攬香料批發，實行肥水不流別人田。風光日子只維持兩年，1997年香港樓市達頂峯，咖喱星不敵業主加租而結業。其後金融風暴，樓價大跌，兩舖位最後蝕讓離場，當年一場腥風血雨，破產者不計其數，星爺倒也看得開，「好似打風一樣，突然嘅嘢大家都預料唔到，唔通我去跳樓呀？」
歷金融風暴沙士 屢敗屢戰
花了三年回氣，2000年捲土重來，趕上私房菜風潮，於灣仔一舉租下兩個舖位，地下賣咖喱，樓上經營私房菜館，2003年聽朋友意見，租下淘大花園商場舖位賣凍肉，兩個月後爆發沙士，淘大淪陷，百多萬元掉進鹹水海，「一車車凍肉送畀人，都冇人要呀，慘㗎！」最後生意全數倒閉，更要賣樓還債。這一役讓他元氣大傷，只好再次下海，日打兩份工，先後在華置及周大福任私廚，晚上又替東華三院等社福機構煮大鑊飯。心裏其實蠢蠢欲動，靜待東山再起，誰知一等便10個年頭，「到𠵱家50幾歲，以我嘅腦筋、做嘢嘅態度，點解成日都搵唔到錢？」
「呢10年，一聽到人話開餐廳佢就心郁郁，有人話畀100萬搞，我叫唔好再搞」。星爺一心向前衝，多年來為與他甘苦與共的「星嫂」Yvonne卻只想歸於平淡，多年來為了勸服星爺退出江湖，夫妻二人爭執無數，「鬧交咪走咗去囉，梗係我走啦，費事同佢嘈，嘈都嘥氣！」說得瀟灑，曾在港大當了10多年辦公室助理的星嫂，為了替夫還債，不惜耗盡30多萬公積金，又為他忍受不少冷言冷語，「最親嘅人講嘅嘢最難受，驚死你陀累佢，唔幫不特只，仲要畀說話你聽，『你自己攞嚟，我啲錢都要留番畀自己！』」
太太的付出，星爺心中了然，「其實我想搞嘢搵多啲錢，想佢舒服吓，點知做極都唔理想！」若果世人真的有三衰六旺，星爺的霉運也應該快將到盡頭。星爺承認衰慣，「就算將來同樣發生呢啲風浪，我都唔會恐懼，起起跌跌都唔會心痛」。
中環特工隊爆料熱線
WhatsApp：9499 3777
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange