電視台旅遊節目Sell浮華，卻帶人食十蚊份午餐肉夾包，嘥氣！秋天要食得浮華，沒有甚麼比得上「餐桌上的鑽石」白松露。出產白松露的意大利北部皮爾蒙特（Piedmont）的Alba區，每年都會把握收成期的短短幾個月，廣邀全球美食家去品嚐切磋兼做大生意。從10月中開始每逢周末，Alba區都會變身假日松露市集，展示全年最靚收成。眾所周知白松露身價不菲，這個產地市集賣的貨就標榜百分百認證，絕不怕花大錢買到假貨。即使是頂級美味，獨沽一味，還是會覺得寡，所以市集亦同時售賣當地農產品及佳釀如Salami、杏仁、朱古力、杏脯蛋糕、榛子、甜白酒Moscato等等，去打個白鴿轉，逐個攤檔執啲，兩三下手勢應該可執出一個松露浮華午餐。
叫得做「節」，意大利人自不忘加入一點熱鬧位。松露節有83年歷史，許多活動都按傳統而行，而其中一項招牌節目騎驢仔，就像《歡樂今宵》抽幸運星一樣經典，Old School而不失刺激趣味。穿插在市集之中的，還有大大小小Cosplay劇場，扮的不是白松露，是意大利中世紀人物。松露節免費入場，有得食有得買又有影相位，難怪長做長有。
83th Alba International White Truffle Fair
日期：10月12日至11月17日逢星期六及日
網址： http://www.fieradeltartufo.org/index.jsp
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange