上季玩完馬後炮，今季就做預言家，同大家一齊睇吓嚟緊周末有咩好睇。今周主題：利物浦對曼聯
英格蘭吹就吹到自己聯賽有幾勁，但國家隊始終未有起色，近年大賽莫講爭冠軍，連入4強都唔多見；英軍問題多多，射手荒係一個因素，對上一位稱得上世界級射手，恐怕要數到奧雲。之後嘅前鋒，迪科爾爆炸力不錯，但耐力麻麻；朗尼沉醉於助攻；高治、安祖卡路爾更加得啖笑，史杜列治可能係紅軍，以至英軍嘅新希望。
有人批評史杜獨食，小弟又唔介意，作為射手獨食冇問題，好似尹佩斯同C朗，經常都佔成隊一半射門數字，最緊要係能夠將射門轉化為入球嘅能力；當然23歲嘅史杜，𠵱家都仲好浪射，特別佢沉醉於自己嘅重炮左腳，絕技就係右路推進，左腳再推大位然後勁射，美斯、洛賓都鍾意呢招，當然成功率較史杜高好多。
如果要將史杜提升至另一個層次，小弟覺得要改造佢打正箭頭，先至係長遠之策。蘇亞雷斯一時嗌走，一時又話留隊，唔係利物浦球迷都覺得煩，始終佢都係養唔熟，倒不如乾脆賣走佢，換番啲錢再執靚個陣。史杜雖然身材唔係高，但平衡力唔錯，始終英格蘭基本青訓出身，頭槌都頂得吓，總好過手軟腳軟嘅伊亞高艾斯巴斯，同埋成日受傷的男人波連尼。如果我係羅渣士，會試吓安排史杜打單箭頭，等菲臘比古天奴支援佢，情況好似英格蘭國家隊，相信佢同朗尼一前一後，亦都會合作愉快。文：牽牛
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange