失威！輸死人！損兵折將！喺周二嘅英聯盃，利物浦迎戰甲組仔諾士郡，竟然要踢到加時先贏到，令到唔少捧場客失望。但最大鑊嘅係，高路托尼鼠蹊受傷，可能要長唞，下周日對唔到曼聯；阿里施蘇高同祖阿倫亦因傷退下火線。
足智彩呢場嘅「讓球主客和」都開得好狠，主場嘅利物浦[-2]，「主勝」賠率喺周一仲超過兩倍，但紅軍呢場陣容都幾強，有史杜列治、謝拉特、高路托尼同米洛列特等主力，所以賽前不斷落飛，「主勝」嘅最終賠率熱到1.75倍！
加時先贏甲組仔4:2
故事嘅開始都符合捧場客嘅預期，利物浦靠史達寧同史杜列治各入一球，半場領先英甲嘅諾士郡2:0。不過，紅軍又衰海鮮波，換邊後連失兩球，阿昆同高姆斯幫諾士郡追平2:2完場；相信唔少捧場客睇到眼都凸！利物浦喺加時先生性，由史杜列治同佐敦軒達臣建功，以4:2擊敗對手，有驚無險地晉級第3圈。
失威事小，傷兵事大！今季由曼城以自由身來投嘅高路托尼鼠蹊受傷，要由擔架抬出場，睇落都幾嚴重。至於啱啱加盟嘅阿里施蘇高亦黑仔，首次正選，但踢唔夠10分鐘觸傷足踝，要被換走；另外祖阿倫都因傷退下火線。紅軍領隊羅渣士賽後話：「我哋周三會詳細檢查佢哋嘅傷勢，施蘇高咁早就受傷，令人失望。至於高路托尼就拉傷鼠蹊，要再作檢查，但情況唔樂觀。」
羅帥補充，好在另一位中堅史卡迪爾已經克服膝傷，下周日有望喺雙紅會頂替高路托尼，夥拍丹尼爾艾格踢中堅；但如果呢兩位中堅又有傷嘅話，紅軍就要焗用小將韋斯頓，到時我求大俠真係怕利物浦條防線穿晒窿。英國《每日郵報》話，羅渣士想簽入巴黎聖日耳門（PSG）中堅馬馬度沙高應急，但呢位法國守將都好多人爭，兼且喺PSG食好住好，又有歐聯踢，相信吹水多。
一副24字的對聯影響蔡瀾一生，今集《亂噏24》，蔡瀾為你逐句解釋！
點擊以下連結，全集即時重溫！
http://bit.ly/appletalk24