【中環蘇豪】前日係Cool魔張智霖（Chilam）42歲生日，無獨有偶，郭晶晶個金叵羅又喺前日出世。近日人氣急升加上高價簽咗畀經理人公司，Chilam呢個生日特別有意義，自然要好好慶祝一下，所以前晚佢兩公婆就同一班圈中好友，去咗中環蘇豪區一間日本料理開餐。
前晚接近9點鐘，Chilam同老婆袁詠儀（靚靚）去到餐廳嘅廂房，之後好朋友蔡一智夫婦、伍詠薇夫婦、Chilam表姊上山詩鈉先後到場，當然唔少得佢嘅打邊爐鐵腳沈嘉偉兩兄弟，同埋豆斗邱淑貞。
被拍煲煙鳥獸散
接近10點鐘，餐飯食到接近尾聲，上山詩鈉、豆斗同老公沈嘉偉煙癮起，走咗出餐廳門口食煙，不過當佢哋一見到有記者影相，就好似見鬼咁鳥獸散。到10點半，各人酒醉飯飽陸續離開，主人家Chilam拖住靚靚出門口送朋友上車。
問Chilam收到乜嘢禮物？佢話：「冇禮物收呀。」因為預咗飲酒，所以冇揸車嘅Chilam，行咗出馬路伸手截的士，舉手其間唔覺意露出佢嘅Calvin Klein內褲同少少腩肉。因為Chilam同蔡一智都住喺南區，所以阿智兩公婆都上埋車離開。
採訪、攝影：梁繼光、李志明
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！