有員工問過我，老闆請食飯，唔去得唔得？雖然話老闆請是免費，好多同事都是勉為其難地去，能夠滿懷歡喜真心想去的，坦白講，為數不多。既然老闆開得聲請食飯，不論是甚麼原因，是真心還是假意，要是員工支支吾吾、裝聾作啞、諸多推搪，你話做老闆的會有甚麼感想？老闆和員工之間的關係並不一定融洽，同枱食飯各有各食，話不投機半句多，氣氛確實尷尬。有得選擇的話，寧願留在公司食飯盒好過！
老闆未到別點菜
同老闆食飯，豈止食飯咁簡單？從位置安排，可知老闆心中誰份量最重，又可以看出老闆如何對待員工。不過無論如何，都該有最基本的禮貌及禮儀要遵守。最近有位老闆和我呻，為因做成了一宗大生意，所以請員工食慶功飯，那天他要外出見客，所以請同事逕自去食飯地點。他未到有同事先自行落單點菜，見他到來都沒有打招呼，自顧自開餐，他覺得很不是味兒。不是餸菜的平貴問題，這餐既是老闆請的公司飯，無論如何都應該等公司安排等老闆到才可上菜，怎可擅作主張？
可能有人會認為既然請得食飯，就不要斤斤計較咁小氣。但凡事總有大細莊閒之分，喧賓奪主冇規矩又冇教養是大忌。我覺得最奇怪的反而是人不是菜。跟官咁耐都應知官姓乜，新來的不識規矩算，年資長的那些主管或者同事應當知，見同事自行點菜，為甚麼沒有人出言阻止？提點、提示一下？追問原因，原來是那幾位同事仔一馬當先到場，說時遲那時快，主管們去到之時他們經已據案大嚼，連提都沒有機會提。究竟是同事仔們從未被教過所以不懂禮儀？還是真的很肚餓忍無可忍？我是百思不得其解，你們呢？
張慧敏
http://www.facebook.com/HKcareerdoctor
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange