雖然菲菲極少用騰訊（700）旗下的WeChat，但大家絕唔可以睇少呢個App的吸金力。WeChat過去一直被市場批評燒銀紙，有支出，冇收入。不過，月初推出WeChat 5.0版本，明顯要將個App打造成搖錢樹。先有全新支付功能，擺明車馬賣理財產品，WeChat做agent，騰訊先撈一筆。
至於新加入嘅遊戲功能，就更有talking point。新遊戲「打飛機」推出未滿月，就已成功掀起熱潮。
千萬咪質疑遊戲賺唔到錢，眾所周知，騰訊幾乎所有服務，都只係向其他已有程式致敬。所以只要參考佢複製對象，就推算到WeChat有幾大潛力。南韓最多人用嘅Kakao Talk，上年9月先發佈遊戲平台，就成功令公司擺脫連續三年虧損，轉眼賺650萬美元。
至於同於上年打入遊戲市場嘅LINE，根據地日本已勁賺錢，公司整體亦有望於下年轉賺。
目前Kakao Talk同LINE用戶，分別係1億及2.3億，遊戲推出無幾耐，盈利能力已經有成績，至於WeChat用戶人數高達5億，所以只要一發力，倒模對家模式返中國，賺錢能力分分鐘嚇死人。
Fifi
本欄逢周二、四刊出
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange