旺旺（151）周二公佈上半年多賺逾三成至3.08億美元後，股價已經炒高逾一成。就算噚日個市驚緊美國同敍利亞開火，都只係微跌不足1%收11.34元。
麥格理睇好 上望13.6元
睇番旺旺份業績，上半年主要利潤貢獻依然來自乳品及飲料業務，分部利潤急增逾45%至2.73億美元，休閒食品業務亦增長15%至1.17億美元。整體毛利率仲升逾4個百分點至41.2%，當中乳品及飲料毛利率更顯著急升。
不過摩通提醒，旺旺毛利率急升全靠原材料成本大跌，但各大業務實際上無乜強勁反彈，上半年收入趨勢同舊年下半年差唔多。同時，經營成本佔收入比高達21%，係2009年以來最高，故降低今年度盈測，睇淡會跌番去10元。
牛奶產品係旺旺主要推動力，不過，受累內地掀起奶粉加價戰，搞到旺旺要買貴貨生產牛奶，成本勢必增加。麥格理就認為唔使太擔心，首先旺旺產品組合改變，新產品毛利率普遍都較高，所以就算下半年奶粉價格升兩成，最壞情況下，整體毛利率都只會跌約1%。所以，繼續睇好旺旺跑贏大市，調升目標價至13.6元。
雖然大行意見有啲分歧，但旺旺品牌影響力強勁，又積極推新產品，長線的確看高一線。只是今年預測PE達28倍，略高於行業。暫時可睇定啲唔好亂衝，待股價唞一唞都唔遲。
瑪姬兒
一副24字的對聯影響蔡瀾一生，今集《亂噏24》，蔡瀾為你逐句解釋！
點擊以下連結，全集即時重溫！
http://bit.ly/appletalk24