今年業績期過後的股價走勢特別難估，皆因在如此波譎雲詭的大圍氣氛底下，企業管理層給予市場「有參考價值」和「具可信性」的指標，都少之又少。再加上市場預期原本就低，導致唔少股份在放榜前已被勁short，反而績後無想像咁爆差，觸發大家平淡倉走人，反之亦然。
業績期快完，初步總結一下表現：港資企業大多表現穩健理想，但要升的亦早已升晒；中資雖遜色，惟程度亦屬預期之內，就算大家關心的內銀股，資產質素轉壞的趨勢，亦不教人意外。所以業績後，券商大都因應自己的盤算來對股份各自演繹，績差的可以說見底，績好又說margin到頂，情況甚為兩極。金魚缸邊的朋友都說，今次業績，可說是近年來最沒有啟示性的了。
後市如何？市場人士似乎仍未找到具體方向。中國經濟數據有點好轉迹象，但仍不構成芬佬們全面拋下戒心轉view。尤其是，9月仍有很多關口位要過。美國聯儲局會否開始收水，已是一大問題。資金持續回朝、對已經亢奮了N年的新興市場有幾大影響，相信大家近日睇亞洲貨幣市場，已經感受到。而且美國那個一再推遲的「財政懸崖」──債務上限話咁快又到期喇。雖然了無新意，但波動似乎難免。
海迪
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange