近排個市難玩，小弟認為現階段宜打游擊，或者炒冷嘢。講到冷嘢，今日介紹隻噚日一度逆市爆升34%嘅勇利航業（1145）。呢隻股上個月尾失驚無神，喺短短兩日內，由0.27元起步，最高升到去4.1元，急升超過14倍，之後就慢慢陰跌，跌足差唔多成個月，係噚日先出現第一支較似樣嘅大陽燭。睇落好似好嚇人，唔知就會以為佢砌到高一高，之後就慢慢派貨，但睇真啲，原來係相反，係收緊貨。
大戶收齊貨隨時開車
聯交所紀錄顯示，南華證券密密收集。喺今個月20號之前，南華證券係一股勇利都冇，但就喺20號，佢突然多咗1,157萬股，直到前日，即係27號，佢嘅持股量再增至3,075萬股，跟住就到噚日逆市上升，或者可以視為收齊貨開車嘅表現。
勇利街貨唔多，上個月18號，即上個月19號開車前一日，只有11間證券行持貨，係極度小圈子，當時首四位揸貨最重嘅證券行係匯豐銀行、交通銀行信託、富銀同輝立，持貨比例係14.29%、8.94%、2.04%同1.88%。經過個多月後，持貨證券行增加到幾十間，但新增嘅證券行好多都係濕濕碎，揸得幾萬股、幾千股。不過最關鍵嘅首幾位卻多咗貨，好似匯豐咁，最新持股竟然增至24.3%，多咗10個百分點，第二位嘅交行，就輕輕回咗落去8.16%，至於第三位嘅位置，就被剛提到嘅南華取代，持2.9%。
純粹倉口變化，貨源好似比之前打散咗，但實際揸重貨嘅反而仲揸多咗，由此肯定過去一段時間唔係派貨，而係打返落嚟收貨兼交波，噚日呢一支大陽燭應係一個完成交波嘅訊號。
解構完貨源問題後，再睇番公司業務，勇利係新加坡資金背景，主營船舶租賃，過去兩個半年度都係蝕錢，不過最近個半年結就虧損收窄。不過重點係佢喺6月25號發表通告話，將進行多元化發展，投資新加坡物業，簡單啲講，佢會搞埋新加坡嘅地產業務。合晒潮流，因為近期新加坡最新施政報告大興土木。
通告仲講明會set投資金額上限，如投資喺公司身上，規模唔會超過1,000萬美元（另可後續投資）；如果係投資物業身上，就唔會超過3,000萬美元（已包後續投資）。即係點計都要兩、三億港紙投資額無走雞，而佢𠵱家個市值只得7.4億元，似乎仲有發水嘅空間。
總括而言，勇利早前咁輕易升到上去4.1元高位，可以反映幕後實力好強，而經過超過一個月嘅收集後，似乎又想做嘢。唔好話睇番佢之前4.1元高位咁大貪，用近期最流行嘅殼股方程式嚟計佢個目標價，假設佢先以殼價賣出，然後大股東買返本業走人，條數就係4億元殼價加5.3億元NAV，即接近10億元，折合每股係1元樓上，現價0.7元買嘅潛在升幅有43%。
陳承龍
本欄逢周四刊登
一副24字的對聯影響蔡瀾一生，今集《亂噏24》，蔡瀾為你逐句解釋！
點擊以下連結，全集即時重溫！
http://bit.ly/appletalk24