鋼鐵股肯定係2013年嚴重跑輸大市嘅板塊。連蝕兩年錢嘅鞍鋼（347），A股一早已經戴上ST帽仔（ST係特別處理咁解）。去年馬鋼（323）蝕咗39億人仔，成為ST股機會忽然大增，大家諗住佢都會「窄窄地」，雖然都係蝕錢，但今次天使在細節，第二季竟然賺5,200萬人仔，仲要係由2011年第三季以來首次賺番錢，管理層確係有啲計！
大家都知，中國鋼鐵業正處於「高產能、高成本、低效益、嚴環保」的十字街角路口中，上年全行業資產負債比率達68.8%，超過70%嘅企業有成50家，價格又創新低，以94年100蚊嚟計，利潤只得0.43元人仔，真係見到都心驚膽跳。
要交到業績，唔使讀書同MBA都知一定係開源同節流。馬鋼來自鋼鐵產品嘅其中三項毛利率都急升，個別業務更收入增加同時成本減少（即係又做運動加節食，效果確實係快好多），證明馬鐵嘅高層開始掌握到大環境不景氣的逆境求存之道——加強唔同環節把關，減庫存，控制採購成本，確係一步一步咁往前繼續衝、衝、衝！
再蝕都頂得住
鐵礦石回升可以減少原材料庫存減值損失，但同時又為毛利率下跌「整多一刀」，都咪話唔煩！加上半年蝕咗3億人仔已經係硬過Ironman嘅事實，惟有向阿媽賣咗12間公司股權同非鋼鐵主要資產，現金作價38億人仔，估值約29億人仔，一來一回賺近9億人仔，講就講話增加資產流動性及專注主營業務，Pro J覺得一個唔好彩（touchwood），下年再蝕多一個3億，成間馬鋼都仲頂得住！先除ST之慮，活到明天，首先要捱過今天，馬鋼方向係正確嘅！
徐燦傑
中國銀河國際財富管理主管
本欄逢周三刊出
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange