無綫重頭劇《衝上雲霄II》進入直路，就快大結局，接住下個月9號會播謝天華、張兆輝同周海媚主演嘅新劇《神鎗狙擊》，近日無綫開始播啲宣傳片，都係以男主角做主導，當中謝天華同張兆輝喺劇中係死對頭嘅關係，兩個仲有好多喺鎗會玩鎗、戴晒眼罩耳筒嘅造型，唔知係條宣傳片拍得太有電影感，定係「片有相似」，睇咗宣傳片嘅人都話諗起張國榮套電影《鎗王》。
不過咁，玩鎗嘅裝備就一定係差唔多，又難怪觀眾會諗起哥哥張國榮套經典電影，究竟係咪想向哥哥致敬？至於謝天華同張兆輝係對立，又好似張國榮喺戲中同方中信嘅關係咁喎，雖然呢啲橋段都好常見，不過兩者有咁多雷同，難免令人諗係咪巧合咁簡單！
張兆輝：橋段大致都係咁
《神鎗》主角之一嘅張兆輝噚日就喺電話度話：「唔似嘛？係你哋太掛住哥哥咋啩！」佢坦言未睇過《神鎗》嘅宣傳片，不過都好老實咁話：「咁講鎗會嘅嘢，啲鏡頭都係咁上下㗎啦，我哋呢套係劇集，同電影唔同嘅，不過戲嘅橋段大致都係咁，劇裏面都有講飛虎嘅嘢，唔通又話我哋似飛虎咩？動作戲都係咁啦，大家不如睇埋套劇先話似唔似啦。」
版主：陳基征
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！