【灣仔→半山】陳山聰自從同賭王三房長女何超雲分手之後，被稱為「四失聰」兼開始潛水，似乎唔係好敢出嚟見人。佢哥哥陳山海就話細佬有嘢搞，不過搞乜嘢真係冇人知，淨係之前傳過無綫監製王心慰想搵陳山聰喺新劇《忠奸人》演奸角，不過山聰驚做完奸角仲難翻身而推咗。山聰就連之前同超雲拍拖時，成日用嚟晒恩愛嘅微博都戒咗，冇再上載新相。
同保安熟絡
雖然係咁，不過山聰始終都係藝人，所以警覺性依然好高。前日下晝差唔多6點鐘，山聰坐嘅的士駛經灣仔星街時，佢已經好快發現有記者採訪，之後佢全程不停向後望，十級警戒！最後架的士駛咗去半山嘅豪宅The Mayfair，到達目的地之後，山聰喺架車度搞咗一輪，似乎係等大廈保安開咗玻璃門畀佢，佢至急急落車。
山聰雖然有啲失魂落魄，不過潮人始終係潮人，見佢一身好打扮明顯襯過，恤衫西褲、着鞋唔着襪，對皮鞋仲要有金片包踭。山聰唔想見人，不過臨入大門嘅時候，不忘用好凌厲嘅眼神望記者，之後直至上電梯都係全程面壁，唔畀記者影相。據知山聰有老友住喺嗰度，所以佢周時都會上去打躉，難怪保安同佢咁熟。
採訪、攝影：梁繼光、朱志聰
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！