繼散戶至愛嘅陸東提出樓價兩年跌一半嘅驚世預測後，美聯集團（1200）主席黃建業亦高呼樓市要插兩至三成。𠵱家要估樓價走勢，隨時難過中六合彩，但一成跌幅預測明顯唔能夠滿足普羅讀者，將幅度推高至兩成以上，先可以吸引眼球。
愛嘅反面係恨，相信大家都明白，股市其實一樣。當一隻股票壞消息鋪天蓋地，股價又跌到四腳朝天，一旦有丁點好消息，股價隨時升到你唔信。
被二噁烷醜聞纏繞近四年嘅霸王集團（1338）發通告，指去年下半年採用價值鏈導向嘅商業模式，成功減低成本，預期今年上半年虧損按年大幅收窄。一個消息，令霸王噚日彈升28%，收報0.51元，升幅看似誇張，但同歷史高位6.6元比較，累計仍跌逾九成。為咗敗部復活，霸王諗咗好多計仔，包括換代言人、推涼茶產品等，可惜屢戰屢敗。如今透過新模式令生意曙光初露，雖然講賺錢可能為時尚早，但業務重踏正途卻毋庸置疑，齋炒呢個憧憬，以及挾淡倉效應，已經夠晒爆炸性。味千（538）骨湯門效應消散後，最多由低位反彈七成，照咁睇，霸王噚日嘅一棍，只係反彈浪嘅開始！
唐牛
一副24字的對聯影響蔡瀾一生，今集《亂噏24》，蔡瀾為你逐句解釋！
點擊以下連結，全集即時重溫！
http://bit.ly/appletalk24