曼車大戰，一如所料和局收場。但最精采的戰場，卻是賽前的口水戰。一向鼻大的摩佬，回歸英倫後扮咗一輪低調，但「寸嘴」性格難以掩飾，賽前他終於開火，指朗尼轉會困局全因莫耶斯管理手法低劣造成。摩佬最鍾意估你唔到，當年他年少氣盛，肥賓、雲格，幾乎個個教頭同佢「開拖」；當大家期待最德高望重、兼有「更衣室風筒」之稱的費Sir點同佢唇槍舌劍反大面之際，摩佬竟然……同佢friend咗！死未！？
摩佬回歸後首個記招曾大讚莫耶斯，結尾卻又補番句：「到底一個從未贏過任何錦標的領隊，可怎樣帶領這支超級豪門呢？」硬係要放吓暗箭。到了周一大戰前夕更明刀明槍。當曼聯躉擔心冇乜火氣、鬧交唔似強項的莫耶斯，招架唔住摩佬兇猛過大浪的口水戰時，先發現原來莫耶斯先高招：人哋出口術玩心理戰，佢一於只專心做自己最擅長的事……細心備戰；場內，面對心理戰的磨心朗尼，莫耶斯竟當無事發生，當佢「正常球員」派落場，仲不知幾落力。場外，面對摩佬尖銳說話，莫耶斯就像化成一嚿頑石，不痛不癢不反擊。原來出口撩人者，最忌唔係被柴台反罵，而係：冇反應！任你對佢冷嘲熱諷半日，嚿頑石依然完好無缺安坐着，分分鐘鬧嗰個仲激氣。
不過，相信摩佬的心理戰不只得一個回合，尤其莫耶斯地位功績同費Sir冇得比，有機會摩佬實會出招踩到盡。到底莫耶斯呢嚿頑石硬啲，定係摩佬鞋底硬啲？大家買定花生等睇好戲。文：方柏翹
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange