女模Mandy Lieu昨日以合資者及一姐身份，率領國際名模謝斐淵、混血名模Raven Tao、第三代Canon女Melaine Zeller、日模清穗久美子及新晉女模朱韻韻，在尖沙嘴W酒店出席星潮娛樂開幕酒會。Mandy Lieu谷胸性感上陣，但相比其他女模要穿三點式兼落水，明顯升呢做老闆的她較為錫身，好友黃柏高、貝安琪、Rosemary、陳君宜及鍾浠文以嘉賓身份到場支持。
呻拍戲辛苦
Mandy Lieu表現風騷，她透露投資七位數與舊同事合資，自言只是小生意，她說：「Managing嘅嘢我交晒畀其他老闆，佢哋揀咗啲女仔，我都係睇吓，自己會主力拍戲，𠵱家都喺台灣拍緊戲，不過唔可以透露太多，總之要日日打好辛苦，仲要冇飯食食蕉充飢。」
中文名扑槌
大會的新聞稿印上Mandy中文名劉碧麗，她說：「網上好多人都話我叫劉碧麗，其實我否認過好多次，不過問咗相士話OK，索性用呢個名。」對於緋聞男友金剛與周秀娜前男友Avis為女掀罵戰，Mandy表示不知情：「我冇同金剛拍過拖，所以冇聯絡一段時間啦。」
此外，陳君宜表示老公鄭躬明最近經常返內地工作，問會否擔心老公偷食？她說：「我對佢好有信心，反而係佢擔心，不過我好多時候都同佢一齊啦，點會有古怪。」
採訪：何慧斯
攝影：葉君海
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！