瘋狂業績周又到，未來幾日有400幾間公司出業績，真係睇到頭暈！買番兩隻炒業績得唔得？魏力認為，除非已發盈喜，否則以散戶資訊，實難估到條數究竟掂唔掂，值博率只是五成。再者，盈喜股一般業績前已經炒定，一派成績表隨時好消息出貨，睇啱方向都要輸錢，你話幾唔抵？
目前市況交投疏落，唔少散戶都靠邊站；基金大戶格外小心，即使績佳都唔會亂搶貨，故戰友望完份業績，計好數先入場，都唔會買貴好多，命中率亦更高。以金風科技（2208）為例，發咗首三季盈喜，中期業績亦佳，亦只係高開6%，埋單飛升22%，開市買仲有大把水位。
四環醫藥（460）仲筍，中期純利大升34%，毛利、派息全面急升，股價僅高開2%，真係任你買，全日漲7.7%，收報5.18元，但現價仍處超值水平，中短線睇7.80元，可翻半番！
中期業績顯示，銷售增長67%，毛利率升2.4個百分點至79.5%，股息增派39%，反映高毛利藥物賣多咗。事實上，公司於內地處方藥的市佔率由第七躍升至第三，管理層更表明仲有得再上！更重要的是，經營現金流較去年飆升87%，至5.6億人仔，切實反映業務之強勁，化妝也化不來。
假設下半年盈利再增長1成，現價預測PE僅16.7倍，平到笑！以過去三年平均PE 25倍去秤，合理值為7.80元。
魏力
http://www.facebook.com/2012jason
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange