康師傅（322）昨日一張通告，翻開這間企業在十多年前，一度面臨財困、被兼併，最後獲得救助的恩怨情仇。持有康師傅33.17%股權的日本三洋食品，其創辦人井田毅去世，康師傅話井田喺「最艱難時期給予溫暖支持」。相信這句感謝，的確是董事長魏應州肺腑之言。如果無井田，今日康師傅會係邊？
97年亞洲金融危機，康師傅一度擴充過快，加上母公司頂新大搞收購，出現周轉困難，迫到頂新要沽康師傅股權填氹。起初魏應州是搵同胞兼同行統一集團，但統一諗住食硬康師傅，條件辛辣，更堅持要奪得康師傅營運權。正當談判膠着，井田睇報紙見到單嘢，竟然主動聯絡魏應州，話願意入股，同頂新平起平坐，但營運權就留返畀魏家。魏應州曾經講過，一同日本人簽完合同，佢第一時間唔係返天津總部，而是直奔統一老總辦公室，一吐烏氣。
14年來，井田無乘虛而入搞狙擊，魏應州亦以股價表現報答井田，其手持股份升值逾30倍，市值達355億元。呢一役成就了真朋友，但同時令康師傅及統一（220）儼如世仇，多年來唔單止爆出多單封殺同唱衰新聞，最近雙方仲鬥減價、送腸仔，又經常隔空互窒，誓要擊倒對方。
據台灣肥皂劇劇情，未來發展是仔女相戀結婚，化解家族恩怨，但現實唔會咁和平嘅……
海迪
一副24字的對聯影響蔡瀾一生，今集《亂噏24》，蔡瀾為你逐句解釋！
點擊以下連結，全集即時重溫！
http://bit.ly/appletalk24