港股三扒兩撥上番22000點，除受惠A股造好外，績優股亦成功將市況帶旺。噚日推介嘅味千（538）破位，一度高見9蚊，中線繼續向10蚊目標進發。清華大學旗下、主打建築節能嘅同方泰德（1206），上半年盈利增長三成，放榜後拾級而上，噚日再創上市新高。在零蟹貨、食正國策及注資概念下，其尋頂之旅肯定未完。
同方泰德主要提供樓宇自動化及節能方案，內地收益比例逾半，根據2013年智能建築行業發展高𥧌論壇數據，內地智能建築市場規模逾4,000億人仔，再配合阿爺大搞智能城市及城鎮化，前景無可限量。
同方泰德控股股東為同方股份（滬600100），業務涵蓋數字城市、物聯網應用、微電子與射頻技術等12項業務，總資產超過300億人仔，擁有專利及軟件著作權達2,000多個，實力毋容置疑，將來係咁易將當中5%資產注入同方泰德，已經超過後者嘅總市值。
彭博綜合券商預測，同方泰德今年預測市盈率11倍，較同方股份嘅28倍，大幅折讓六成，同方泰德估值平到笑，用14倍市盈率作目標，可見3.67元，潛在升幅27%，屆時估值仍較同方股份平一半。
唐牛
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange