【跑馬地↹銅鑼灣】鄭少秋幫無綫拍嗰部劇集《心戰》上年出街之後一直未見再有新作，可能佢想休息吓同多啲時間陪吓家人啦！好似前日咁，記者就見秋官同老婆官晶華以及兩個女詠恩、詠曦一齊食飯享受天倫之樂，其中細女生得有爹哋咁高又白白淨，都算靚女。開完餐之後，兩個女仲留番啲時間畀父母拍拖行街，認真識做。
拍拖濕平齋睇
前日下晝5點45分左右，秋官孖細女由跑馬地禮頓山屋企方向行去銅鑼灣開平道Cubus大廈嘅食肆食晚飯，兩父女沿途有傾有講。原來官晶華同大女詠恩一早喺食肆等秋官，佢哋一家四口食到夜晚7點半就齊齊落樓走人。兩個女同媽咪特別好傾，三個人一路雞啄唔斷咁講，而秋官就慢慢喺後面行，仲一路行一路諗嘢。四個人行到去安全島等過馬路嗰陣，突然有車響按，嚇到秋官成個彈起咁滯，跟住即時四圍望，以為有危險，後來秋官知道冇事後先至鬆一口氣。
食飽之後，官晶華想睇衫，秋官於是陪老婆走去附近間I.T，而兩個女就好識做，蹺晒手先行返屋企，留番啲時間畀父母拍拖行街。秋官先陪老婆大人睇女裝，不過官晶華睇咗15分鐘都唔啱心水，之後就輪到秋官睇男裝，但兜咗一個圈之後又係睇唔啱，跟住兩公婆就有傾有講咁行返屋企，生活真係好寫意。
採訪、攝影：朱志聰、徐錦池
一副24字的對聯影響蔡瀾一生，今集《亂噏24》，蔡瀾為你逐句解釋！
點擊以下連結，全集即時重溫！
http://bit.ly/appletalk24