香港足總出年就成立100周年，為迎接百歲大壽，足總主席梁孔德噚日話，已搵咗國際足協幫手，希望出年10月嘅國際賽期，邀請西班牙、荷蘭或德國是旦一隊國家隊訪港，咁勁戲碼，相信好多球迷同我求大俠一樣，諗起都興奮。
1914年成立嘅香港足總，出年就100周年，雖然近年本地足運發展麻麻，但足總100歲生日始終係盛事，好似美國足總今年成立100周年，搵咗「羊咩鬚」拉拿斯等前國腳出席連串慶祝活動，6月時仲搵嚟德國同加拿大，同美國踢表演賽賀壽。
國際足協出手搵外隊
我求大俠收到風，足總CEO薛基輔已經度緊點搞百周年會慶，稍後會喺足總董事會研究呢個大project。主席梁孔德噚日應邀出席天行元朗新球季拜神儀式後爆響口，構思中嘅一項活動係國際表演賽，仲已經搵咗國際足協幫手物色頂級國家隊，對象屬意西班牙、荷蘭或者德國。
其實國際足協早喺97同07年，都幫過足總安排國際足協明星隊嚟港賀回歸，加上國際足協向來好重視屬會嘅百周年會慶，相信今次唔會托手踭。主席仲話，賽期大約係明年10月，希望遲啲有更多消息公佈。睇番國際足協出年嘅國際賽期，應該係10月6日至14日，會喺重鋪完草地嘅香港大球場，同港隊切磋吓球技。
港隊隊長陳偉豪當然舉腳贊成：「喺香港做球員，基本上冇乜可能對呢個級數嘅國家隊，如果成事嘅話，除咗可以喺佢哋身上學習，更重要當然喺令外界注視番香港足球，呢點好重要㗎！」
一副24字的對聯影響蔡瀾一生，今集《亂噏24》，蔡瀾為你逐句解釋！
點擊以下連結，全集即時重溫！
http://bit.ly/appletalk24