中秋節就到，月餅廣告空群而出，陳豪、Cool魔月餅海報隨處可見，不過，論最爆嘅，一定係富豪酒店旗下月餅品牌。平面廣告中只見一赤裸上身猛男，兩嚿胸肌六嚿腹肌極為吸睛，但配合佢擘大個口食月餅動作……未免太重口味。
企業要食中秋條水，唔一定只係賣月餅。強國科網王者阿里巴巴聯同Allianz公佈今日推出，史上第一個「賞月險」。只要你投保，如果中秋因天氣問題，你錯失中秋賞月美景，咁就有得賠。
賞月險分兩種package，投保20元（人仔．下同），喺賞月城市（上海、廣州或深圳）中秋賞唔到月，賠50元；另一種係投保99元，賞月城市有41個，賞唔到月賠188元，仲有冰皮月餅同中秋一日意外保送。
抵唔抵真係見仁見智嘞，但賞月險極具創意，夠gimmick。阿里只係花少少錢，就已為淘寶保險做到一次大型宣傳。仲話將來會推出「單身險」、「愛情保鮮險」之類嘅保險。
阿里繼餘額寶後，今次再推震撼性服務，可見公司創意爆棚，相信搵錢潛力一流。假如佢真係喺香港上市，的確一抽無妨。
Fifi
本欄逢周二、四刊出
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange