出道12年嘅鍾欣桐（阿嬌）噚日喺微博宣佈改名做鍾欣潼，現年32歲嘅佢已經4度改名，出世叫鍾狄珊，2歲變鍾嘉勵，入行叫鍾欣桐，𠵱家失驚無神又改名！佢喺微博留言：「你沒有看錯，我是改了名字啦！」不過，好多粉絲都唔贊成：「你點可以咁自私？我哋已經習慣咗鍾欣桐，你霎時間話變咗鍾欣潼，我怕我哋冇咁多個十二年去適應。」
身份證都改埋
點解阿嬌又改名？佢經理人霍汶希同馮仁昭講：「阿嬌想有新改變同新開始，覺得潼字適合自己多啲，佢鍾意呢個字，仲會改埋身份證，佢覺得今年好多嘢改變咗，自己有唔同進步，所以希望喺名有新改變，令自己喺好角度重新出發。」
咁究竟鍾欣潼呢個名有乜利弊呢？堪輿家麥玲玲話：「阿嬌本身八字五行不調，屬土，天寒地凍出世嘅土，舊名幾旺佢，但桐比較異性緣強，但姻緣運差。而佢明年轉大運，有木補充，唔使再用木，而潼字晚運好整體好，名氣運同搵錢運都強，仲會識到有錢男仔，姻緣運強化咗，補救旺夫運，35至40歲有結婚運，異地姻緣好啲。」至於弊處就係潼字好凍，水唔利阿嬌，怕焦慮會多咗同情緒化起落大。
撰文：馮仁昭
一副24字的對聯影響蔡瀾一生，今集《亂噏24》，蔡瀾為你逐句解釋！
點擊以下連結，全集即時重溫！
http://bit.ly/appletalk24