景褔（280）市值得4億幾銀，只及同業3%，又係最大折讓嘅珠寶股，呢期重整業務動作頻頻，惹人暇想，買景褔博升九成。
景褔今年4月宣佈供股2股供1股，連埋供股攤薄後NAV，仍然有1.52元，現價（0.76元）折讓高達50%，或0.5倍市賬率（PB）。場內同業PB，周生生（116）1.9倍、六褔（590）2.2倍，周大褔（1929）更加高達3倍，景褔至平。
現價仍處海嘯殘位
再講，景褔繼上年沽清港交所（388）證券投資，再喺上個月終止證券業務。家陣景褔除咗珠寶業，只係剩番年蝕上千萬嘅建築業務，若果建築業都終止埋，景褔淨身味道好濃。
景褔現價，講緊仲喺08金融海嘯呢啲低殘位，大股東控股權市值，不過2.4億銀咁大把，平過殼股。集團清乾清淨非核心業務，令日後好似變身等等嘅可塑性提高。
再排除晒呢啲可能，景褔淨身，為求集中火力湊番好核心珠寶業盤生意。而以集團家陣得4.9億銀市值（若果唔計供股，市值係得3億銀咁大把），只及謝瑞麟（417）近半市值水位，更加只得周生生及六褔呢類市值過百億銀同業嘅3%。所以，景褔業績一旦轉好，市值追番上同業，一樣可以不得了。
對上兩年，景褔一踏入9月後，係一升就狂爆格。好似上年9月頭，景褔由0.68元，短短兩個星期，就搶升咗1倍到1.4元。而11年10月，亦翻咗一番到1.4元。
博景褔呢個走勢周期及目標位奏效，可見1.4元，較現價仲要升多90%，到時集團PB都只係得0.9倍，淨係追到上謝瑞麟，未有耐上到周生生等嘅PB水位。
錢雋
細價股專家
本欄逢周二、五刊出
一副24字的對聯影響蔡瀾一生，今集《亂噏24》，蔡瀾為你逐句解釋！
點擊以下連結，全集即時重溫！
http://bit.ly/appletalk24