退出娛圈19年45歲何美婷靚靚掃貨

退出娛圈19年
45歲何美婷靚靚掃貨

【銅鑼灣】曾奪85年健美小姐季軍嘅何美婷𠵱家已經45歲,報道指佢94年退出,97年嫁咗畀個美國商人,跟住就移民當地。呢幾年真係好少見何美婷現身香港,不過大前日下晝5點幾,佢獨自喺銅鑼灣時代廣場嘅city'super買嘢,一身黑色打扮嘅何美婷,醒目戴住黑超遮素顏,好耐冇見嘅佢,身形同樣貌變化唔大,比起走晒樣嘅王祖賢,佢算保養得唔錯。

曾戀溫兆倫

何美婷86年主演無綫劇《城市故事》,同劇中拍檔溫兆倫擦出愛火花,不過戀情好快玩完。佢喺90年同妹妹何美美曾轉投亞視,94年息影。何美婷婚後叠埋心水做人妻,生活低調。佢大前日就去咗銅鑼灣行超巿,佢先喺凍櫃揀咗兩包火腿同煙肉,跟住又周圍行,唔知係因為何美婷由美國返嚟唔熟路,定係city'super內部裝修,佢想買麵包又搵唔到,要向店員查詢,搵到即刻買咗一包。

戴住黑超嘅何美婷喺度搵麵包。

素顏嘅何美婷似乎冇乜走樣。

為咗慳時間,何美婷又再問店員邊度畀錢少啲人,喺店員指示下,佢好快畀錢走人。支持環保嘅何美婷冇要膠袋,佢就咁拎住啲嘢去咗停車場攞車。
採訪、攝影:徐錦池

何美婷同溫兆倫拍無綫劇《城巿故事》,當年仲擦出愛火花。

何美婷85年參選無綫健美小姐,同屆嘅有劉美娟同馬清儀。

唐麗球同何美婷(右)青春無敵。

逢周五隨《蘋果日報》附送嘅時尚美容雜誌《add》雖然早已派完;
拎唔到書嘅朋友,可以上番《add》嘅官網 http://add.appledaily.com 睇番足本網上版,除咗有專訪外,仲有好多時裝靚嘢睇!